Kryeministi në detyrë, Albin Kurti bashkë me ministren në detyrë të Ministrisë së Administrimit së Pushtetit Lokal, Emilija Rexhepi, ka vizituar qytetin e Drenasit, ku u prit nga kryetari i kësaj komune, Ramiz Lladrovci dhe disa nga drejtorët e komunës.
Gjatë këtij takimi u diskutua për gjendjen në komunën e Drenasit pas paraqitjes së pandemisë COVID-19, meqë rast Lladrovci thesoi se komuna që ai drejton nuk është prekur ende nga pandemia.
Lladrovci ka falënderuar kryeministrin Kurti dhe ministren Redžepi për vizitën, duke shtuar se janë në zbatim të plotë të gjitha masave dhe se qytetarët me disiplinë të lartë po i përmbahen.
“Ne me kohë i kemi marrë të gjitha masat e nevojshme për të parandaluar përhapjen e virusit, gjithmonë duke respektuar rekomandimet e IKSHP-së dhe vendimet e Qeverisë. Deri tani nuk ka raste të konfirmuara me rezultat pozitiv të virusit, dhe për këtë falënderoj qytetarët të cilët po i zbatojnë masat dhe rekomandimet. Gjithashtu, falënderoj gjithë akterët e angazhuar, si punëtorët shëndetësorë, të administratës komunale, inspektoratin, Shtabin Emergjent, zjarrfikësit, zyrtarët policor, dhe të gjithë vullnetarët që kanë ndihmuar me donacione”, ka deklaruar Lladrovci.
Lladrovci në emër tij dhe kryetarëve tjerë, ka shprehur indinjatë të thellë lidhur me masat e reja të Qeverisë të cilat nuk janë hartuar në konsultim me komunat, për të cilën ka reaguar edhe publikisht Asociacioni i Komunave të Kosovës.
Ndërsa, Rexhepi në këtë takim ka thënë se pajtimin e komunave për vendimin e mbrëmshëm e ka marrë nga Drejtori i Asociacionit të Komunave, Sazan Ibrahimi.
Në fund të takimit, Kurti ka përgëzuar Lladrovcin dhe qytetarët për disiplinën e treguar në zbatimin e masave dhe menaxhimin e situatës. /Telegrafi/