Liverpooli finalizon marrëveshjen për Carvalho – lojtari i kalon testet mjekësore, nga 1 korriku kalon te klubi i ri

Liverpooli e ka finalizuar marrëveshjen për Fabio Carvalhon, të cilin do ta transferojë për pesë milionë euro plus shtesat në afatin kalimtar veror nga Fulhami.

Anësori kishte arritur marrëveshje për kushtet personale që në afatin kalimtar të janarit, mirëpo klubi i tij e refuzoi ofertën e parë të Redsave dhe më pas nuk pati kohë për një ofertë të re.

Jurgen Klopp nuk e humbi asnjëherë interesimin për 19-vjeçarin dhe e ka siguruar marrëveshjen para se të bëhej lojtar i lirë, kur edhe mund të merrte oferta tjera.

Lojtari i ka përfunduar edhe ekzaminimet mjekësore dhe nga 1 korriku (pasi t’i përfundojë zyrtarisht kontrata me Fulhamin) do të jetë futbollist i Liverpoolit. Njoftimi zyrtar për transferimin pritet të bëhet në muajin e ardhshëm.

Lexo po ashtu Interesim edhe nga skuadra tjera të mëdha, Liverpooli përshpejton negociatat me Fulhamin për Carvalhon

Sipas The Guardian, shtesat do të jenë rreth 2.7 milionë euro, ndërsa eksperti i transferimeve Fabrizio Romano njofton se kontrata do të jetë deri në vitin 2027 dhe në të është përfshirë klauzola e shitjes eventuale. /Telegrafi/