Hysen Muzliukaj, ish-këshillar i ministrit të Bujqësisë, Faton Peci, është liruar të shtunën nga paraburgimi.
Ai u arrestua një ditë më parë si i dyshuar për “keqpërdorim të detyrës zyrtare” derisa ishte drejtor në Komunën e Mitrovicës. Ndaj, gjatë ditës ai u shkarkua nga ministri Peci.
E për lirimin ka njoftuar avokati i tij, Ahmeti Tahiri përmes një postimi në “Facebook”.
Tahiri ka thënë se epilogu përfundimtar do të jetë pafajësia e tij.
“I lumtur që Gjykata Themelore në Prishtinë korigjoi gabimin e Prokurorisë Speciale duke refuzuar kërkesën e saj për caktimin e paraburgimit mdaj klientit tim, Hysen Muzliukaj!”, ka shkruar avokati.
Prokuroria Speciale njoftoi më 14 korrik 2023 se dy persona janë arrestuar nën dyshimet për kryerjen e veprës penale të korrupsionit. Përpos Muzliukajt, i arrestur ishte edhe nënkryetari i Komunës së Mitrovicës, Faruk Mujka. /Telegrafi/
