Policia e Kosovës ka bërë të ditur se një person ka raportuar se ishte lidhur me litar skaje rrugës dhe i janë grabitur një qese najloni me para.
Rasti ka ndodhur të mërkurën në Deçan në ora 08:50.
“Është raportuar se viktima mashkull kosovar, ishte hasur i lidhur me litarë në skaj rrugës, nga dy dëshmitarë në rrugën magjistrale Deçan-Gjakovë. Njësitë relevante policore kanë dalë në vendin e ngjarjes, kanë takuar viktimën i cili ka deklaruar se derisa kishte qenë duke e drejtuar veturën në rrugë ishte ndaluar nga tre persona të panjohur, të maskuar njëri prej tyre i armatosur, të cilët ia kishin grabitur një qese najloni në të cilën kishte pas para të gatshme dhe me një veturë ishin larguar në drejtim të panjohur”, thuhet në raport.
Viktima ka pranuar tretman mjekësor, rasti vazhdon të hetohet. /Telegrafi/