Pesë persona kanë mbetur të lënduar si pasojë e dy aksidenteve që kanë ndodhur mbrëmjen e sotme në Prishtinë, më saktësisht në Veternik.
Zëdhënësi i Policisë së Kosovës për Rajonin e Prishtinës, Daut Hoxha konfirmoi për Telegrafin, se të lënduarit janë dërguar për tretman mjekësor.
“Është raportuar për dy aksidente trafiku në Veternik, Prishtinë. Rreth orës 18:00 është raportuar për një aksident trafiku ndërmjet tri veturave, ku lëndime kanë marrë dy persona dhe rreth orës 16:40 aksident ndërmjet dy automjeteve, ku lëndime kanë marrë tre persona. Të lënduarit janë dërguar për tretman mjekësor”, tha ai.
Hoxha pohoi se njësitë kompetente të trafikut rrugor janë duke u marrë me rastet dhe procedurat tjera për hetimin e shkaqeve të këtyre aksidenteve të shkaktuara.
Zëdhënësi Hoxha bëri thirrje që shoferët të respektojnë rregullat në trafik.
“Apelojmë tek të gjithë pjesëmarrësit në trafik, veçanërisht tek drejtuesit e automjeteve që drejtimin e automjeteve të tyre ta përshtatin me kushtet dhe rrethanat në rrugë duke iu përmbajtur rregullave në trafik, në mënyrë që të shmangen aksidentet rrugore”, deklaroi ai. /Telegrafi/