Procesi zgjedhor në Lidhjen Demokratike të Kosovës, po vazhdon të përballet me tensione.
Pas, raportimit të mediave për konflikte në mes të atyre që kanë pretendime për karrige në strukturat e LDK-së në Podujevë, ka reaguar ky subjekt politik.
Përmes një njoftimi, LDK, ka thënë se procesi zgjedhor ka shkuar mirë, në të gjitha nëndegët e saj.
“Lidhja Demokratike e Kosovës – Dega në Podujevë, sot ka përmbyllur me sukses kuvendet zgjedhore në të gjitha nëndegët e saj. Procesi zgjedhor në degën tonë është karakterizuar me një pjesëmarrje të madhe të anëtarësisë, ashtu siç i ka hije degës më të madhe në Kosovë, e cila përherë ka dalë fituese në të gjitha zgjedhjet”, thuhet në njoftim.
Sipas LDK-së, lidhur me raportimin se ka pasur përleshje në Podujevë, është propagandë për të manipuluar opinionin publik.
“Masoviteti në pjesëmarrje dhe fuqia elektorale e degës sonë ka bërë që të jetë cak i sulmeve propaganduese me qëllim të lëndimit të procesit dhe dëmtimit të LDK-së në Llap. Tendencë e tillë u pa edhe sot nga medie të caktuara, të cilat provuan të manipulojnë opinionin lidhur me procesin e rregullt zgjedhor të një kuvendi të një nëndege në qytet.
U propagandua se ka pasur incident e dhunë edhe pse fotografitë e video incizimet e publikuara nga vetë këto media qartë i demantojnë pretendimet e tyre”,
Kuvendi i Nëndegës III të qytetit të Podujevës është zhvilluar në përputhje të plotë me Statutin dhe Rregulloren për zgjedhje të LDK-së, ndërsa momentet që paraqiten në video janë debate, të cilat në asnjë moment nuk e kanë dëmtuar dhe penguar zhvillimin e procesit zgjedhor, i cili u përmbyll pa asnjë incident”, thuhet në njoftim.
Ndërkaq, përkundër mohimit për incidente, pamjet e transmetuara në media tregojnë për tensione në këtë Kuvend Zgjedhor.
Gjithashtu, mësohet se Policia kishte dalë në vendin e ngjarjes, pas informatës për tensione…/Telegrafi/