Dega e Lidhjes Demokratike të Kosovës në Gjilan ka reaguar lidhur me largimin nga puna të psikologes Shqipe Kastrati-Haziri.
Në një shkrim në llogarinë zyrtare në Facebook, LDK ka thënë se qeverisja komunale, në mënyrë tendencioze dhe arbitrare ka lënë pa punë një profesioniste të arsimit.
“Shqipe Kastrati-Haziri, një profesioniste e shkëlqyer në fushën e arsimit me mbi (15 ) pesëmbëdhjetë vite përvojë pune në institucionet tona arsimore, duke punuar si psikologe e shkollave pranë Drejtorisë së Arsimit, ish-drejtoreshë e Arsimit dhe së fundi drejtoreshë e Institucionit Parashkollor “Dardania” në Gjilan, është larguar nga puna”, thuhet në reagim.
Sipas tyre më skandaloze është veprimi ku të njëjtës i mbyllet dera e zyrës ku ajo kishte punuar, duke ia ndërruar bravën e derës në mënyrë arbitrare, ngjashëm si para tri dekadave në kohën e regjimit serb.
“Pasi që të njëjtën nuk e lejuan të kthehet në DKA ku e kishte vendin e saj të punës, kishte kërkuar nga Drejtoria e Arsimit që të sistemohet në shkolla si zgjidhje e fundit vetëm për të mos mbetur pa punë, por që sistemimi i saj nuk ka gjetur mbështetje nga udhëheqësit e qeverisjes aktuale komunale. Të gjithë qytetarët e dinë dhe po e shohin se Komuna e Gjilanit është stërmbushur me nëpunës me kontrata në vepër për të cilat kryetari Hyseni , gjatë fushatës zgjedhore i kishte quajtur të jashtëligjshme dhe se me ardhjen e tij në pushtet do ti ndërpresë të gjitha”, thuhet më tej.
Dega e LDK-së në Gjilan, thekson se qeverisja aktuale në këtë komunë jo vetëm se nuk e mbajti premtimin, por e stërngarkoi administratën me këso lloje kontratas , e në disa drejtori e sektorë edhe ndoshta konsiderohen fiktive.
“Për znj. Shqipe Kastrati – Haziri, me mbi pesëmbëdhjetë vite përvojë pune pa ndërprerje, nuk paska asnjë vend të punës në Drejtorinë e Arsimit, se vazhdimi i punës se saj i themeluar me ligj qenka shkelje ligjore sikurse nuk paska vend pune as në shkolla”.
LDK konsideron se ky veprim shpërfaqë tendencën e hakmarrjes politike ndaj kuadrove të të kësaj partie.
“Ne besojmë në drejtësi dhe shpresojmë se organet kompetente do ta zgjidhin drejtësisht rastin. E drejta në anën e znj.Shqipe Kastrati – Haziri do të triumfojë”, thuhet në fund.
