Manchester United thuhet se po përgatitet për nënshkrimin e sulmuesit të Interit, Lautaro Martinez, megjithatë, ata përballen me konkurrencën nga Paris Saint-Germain.
Argjentinasi është një nga sulmuesit më të vlerësuar në Evropë, pasi ka bërë përshtypje që kur u transferua në Serie A nga Racing Club.
Sulmuesi 25-vjeçar ka shënuar 78 gola dhe ka asistuar në 26 të tjerë në 194 paraqitjet e tij në të gjitha garat, duke përfshirë një kundër Barcelonës në barazimin dramatik 3-3 të skuadrës së tij në Ligën e Kampionëve në mesjavë.
Si Man United, ashtu edhe PSG kanë pyetur për situatën e Martinezit në Inter për momentin, por El Torro – një pseudonim që ai e fitoi për pamëshirshmërinë e tij – është i fokusuar vetëm te Nerazzurrët, sipas La Gazzetta dello Sport.
Kjo mund të shqetësojë Djajtë e Kuq pasi ata nuk do të duan të përfshihen në një situatë të ngjashme me atë që u desh të përballeshin gjatë përpjekjeve të tyre frustruese për të nënshkruar me Frenkie de Jong në verë.
Skuadra e Erik ten Hag bëri oferta të shumta për mesfushorin holandez, por nuk mundi të binte dakord për një marrëveshje me Barcelonën, pasi ai mbeti në klubin e La Ligas.
Raportimi sugjeron se agjenti i argjentinasit – Alejandro Camano – u thirr nga klubet për të bërë ‘qasje eksploruese’.
Martinez shpreson të përfaqësojë vendin e tij në Kupën e Botës të Katarit në nëntor së bashku me yje të tillë si Lionel Messi i PSG-së, Angel Di Maria i Juventusit dhe Julien Alvarez i Manchester City. /Telegrafi/