“Unë jam duke u mbytur … Më largoni këtë qese nga koka, unë jam klaustrofobik”. Këto supozohet të kenë qenë fjalët e fundit të gazetarit saudit Jamal Khashoggi.
Kështu së paku, siç shkruajnë mediat e huaja, përcjell Telegrafi, pretendon kreu i hetimeve në gazetën turke Daily Sabah , i cili i ka thënë Al Jazeera-s se bëhet fjalë për një regjistrim audio nga brenda konsullatës së Arabisë Saudite në Stamboll.
Kështu, siç ka thënë Nazif Karaman, Khashoggi, një gazetar saudit, ishte mbytur me vdekje, ndërsa i kishin mbuluar kokën me një qese plastike.
Karaman tha se vrasja zgjati rreth shtatë minuta, sipas regjistrimeve.
Ndërkohë, presidenti turk Rexhep Tajip Erdogan tha të shtunën se një audio incizim lidhur me vrasjen e Khashoggit i është shpërndarë Arabisë Saudite, SHBA-së, Gjermanisë, Francës dhe Britanisë.
Ai tha se Arabia Saudite e di se vrasësi i Khashoggit është në mesin e një grupi prej 15 personash që fluturuan në orët e Stambollit, përpara incidentit të 2 tetorit.
Pretendimet e Karaman vijnë pasi policia turke po i jep fund kërkimit të trupit, por hetimi penal mbi vrasjen e Khashoggis do të vazhdojë, kanë thënë burime të Al Jazeera të shtunën.
Ndërkohë, mediat kanë shkruar se gjurmët e acidit u gjetën në rezidencën e konsullit të përgjithshëm të Arabisë Saudite në Stamboll, ku trupi besohej se u shkatërrua me përdorimin e kimikateve.
Karaman tha se Daily Sabah së shpejti do të publikojë imazhet e mjeteve që u sollën në vend dhe të përdorura nga grupi saudit.
Ai shtoi se gazeta turke do të botojë gjithashtu disa prej regjistrimeve që dokumentojnë momentet e fundit të jetës së Khashoggi.
Muajin e kaluar, kryeprokurori i Stambollit tha se Khashoggi u mbyt kur sapo hyri në konsullatë dhe se trupi i tij u shpërbë.
Arabia Saudite ka thënë se ka arrestuar 18 vetë dhe shkarkoi pesë zyrtarë të lartë qeveritarë, si pjesë e një hetimi për vrasjen e Khashoggi. Ndërkohë, Ankaraja kërkon ekstradimin e të dyshuarve. /Telegrafi/