Ish-gjenerali shqiptar i Divizionit të Kukësit, Kudusi Lame, ka treguar për raportet që ka pasur me Ahmet Krasniqin gjatë periudhës së luftës.
Lame, në “Debat Plus” me Ermal Pandurin në RTV Dukagjini, se pas paraqitjes së FARK-ut në skenë ishte vet ai që kishte kërkuar të takonte drejtuesit e kësaj strukture ushtarake.
“Erdhi Ahmeti, u përshëndetëm dhe i thashë “më vjen mirë që kam para një ushtarak”. “Çfarë po ndodhë në Dukagjin” e pyeta. I thashë a jemi oficerë. Njohim historinë e botës dhe të luftërave. A e dimë se çdokund në botë kur formohen ushtri paralele, ato më nuk luftojnë armikun por vetveten. I thashë “me çfarë guximi ju merrni të drejtën të bëni një ushtri paralele dhe ta futni në Kosovë për të luftuar”. Gjetëm mirëkuptim me Ahmetin. Prezentë ishte në takim edhe Fuad Ramiqi”.
Ish-gjenerali shqiptar thotë se mirëkuptimi me Ahmet Krasniqin ishte se ai do të lejonte këtë të fundit të hapte qendra stërvitore në zonën e Kokësit sa të kishin mundësi.
Lame thotë se vrasja e Ahmet Krasniqit ishte tragjedi e madhe pasi kishte vlera dhe vizion për luftën.
“Ai dinte çfarë thoshte dhe kishte dëshirë të bënte pavarësisht nga pengesat që i bëheshin”, tha ai, përcjell Telegrafi.
Ish-gjenerali shqiptar i Divizionit të Kukësit thotë se Ahmet Krasniqi i ishte ankuar atij se ka dëshirë për plane të mëdha për luftën por i mungonin financat.
“Ai mu ankonte se Qeveria [e Bukoshit] nuk po e mbështeste financiarisht”, tha ndër të tjera Kudusi Lame./Telegrafi/