Policia greke ka publikuar fotot dhe identitetin e dy vrasësve shqiptarë të avokatit grek Mixalis Zafiropoulos.
Njëri prej tyre është Lavdëmir Brahimaj është vënë në pranga. 32-vjeçari ka edhe dy emra e tre mbiemra të tjerë. Mikel dhe Ibrahim janë emrat e tjerë të tij, ndërsa Ibrahim, Brahimas dhe Kastriot janë mbiemrat e tjerë.
Ai është arrestuar të dielën në një kamp romësh në Patra, teksa dështoi të arratisej nga Greqia. Para hetuesve grekë, ai ka pranuar se vrau avokatin grek dy javë më parë në qendër të Athinës, së bashku me një shqiptar tjetër.
Brahimaj pranoi para policisë se ishin paguar fillimisht tre mijë Euro, si një parapagesë për shumën totale 20 mijë Euro.
Ai tha se kishin marrë urdhra nga tre të burgosur shqiptarë që ndodhen në burgun e Koridhalos në Greqi.
Plani ishte për të shantazhuar avokatin e njohur grek, por situata u përshkallëzua duke e qëlluar për vdekje.
Sipas hetimeve paraprake, bëhet fjalë për një shumë prej 5 milionë euro që tre shqiptarët e burgosur pretendonin t’i merrnin avokatit Zafiropoulos për një çështje të mëparshme.