Ky është momenti i bukur kur një burrë 93-vjeçar, “në fund të jetës së tij”, u befasua me një koncert në kopshtin e tij të përparmë.
Sipas mediave të huaja, përcjell Telegrafi, familja e Dick Hockridge bëri një apel në rrjetet sociale duke kërkuar ndihmë për një performancë për pensionistin, i cili është një adhurues i madh i muzikës xhaz.
Ai u pa nga prezantuesja e BBC Radio Newcastle, Kelly Scott, e cila postoi një apel të sajin, dhe përgjigjet erdhën menjëherë.
Pianisti Mark Deeks dhe këngëtarja Jennifer Hastings mbërritën në kopshtin e Dick në Sunderland vetëm dy ditë më vonë.
Ata luajtën këngët me të cilat Dick dhe gruaja e tij Agnes kishin vallëzuar gjatë viteve, duke përfshirë të preferuarën e tyre të të gjitha kohërave Moon River.
Dick, një ish-punëtor i kantierit detar, u ul në dritare, duke kënduar së bashku – ndërsa anëtarët e emocionuar të familjes dhe fqinjët shikonin.
Në fund të koncertit, Dick mblodhi forcën për të thënë disa fjalë.
Ai tha: “Gëzuar Krishtlindjet dhe një Vit të Ri të gjithëve në mbarë botën. Paqja qoftë me ju. Faleminderit”. /Telegrafi/
