Deputetja e Lëvizjes Vetëvendosje, Albulena Haxhiu, ka bërë të ditur se në agjendën e seminarit të 93-të Rose Roth, nga Asambleja Parlamentare e NATO-s – që do të mbahet në Prishtinë – Marko Gjuriq prezantohet si drejtor i “Zyrës për Kosovë dhe Metohi”.
“Më 22-24 tetor, Asambleja Parlamentare e NATO-s, do të mbajë në Prishtinë, Seminarin e 93-të Rose Roth. Meqë si subjekt politik do të jemi të pranishëm me tre përfaqësues, dje nga Kuvendi i Kosovës kemi pranuar agjendën e këtij organizimi.
Sipas së njëjtës, panelist në sesionin e II-të, do të jetë edhe Marko Gjuriqi, i njëjti i cili në secilën formë lufton Republikën e Kosovës.
Por, ajo që vërtetë është skandaloze dhe për ne e papranushme, është pranimi që Kuvendi i Kosovës, i bën zyrës për ‘Kosovë dhe Metohi’, pasi që në këtë axhendë thuhet se i njëjti do të përfaqësoj zyrën për “Kosovë dhe Metohi”.
Nuk kam informacione se nga kush është përpiluar kjo, por për këtë skandal duhet të na jap përgjegjësi, Xhavit Haliti, i cili njëherit është edhe kryesues i delegacionit të Kuvendit të Kosovës në AP të NATO-s.
Bashkëngjitur gjeni faqen 3 të kësaj agjende”, thuhet në reagimin e saj. /Telegrafi/
