Nga e hëna kushdo që refuzon të vetë-izolohet në Angli, do të gjobitet me nga 10 mijë funte, raportojnë autoritetet.
Sipas medieve të huaja, përcjell Telegrafi, secili që rezulton pozitiv me COVID-19 ose personat që kanë qenë rast kontakti me të infektuarit e kanë për detyrë të vendosen në karantinë.
Masa e re e cila hyn në fuqi në fillim të kësaj jave erdhi pasi një studim tregoi se vetëm 18 për qind e njerëzve që shfaqën simptoma ishin izoluar në vend.
Ndërkohë, qeveria premtoi se do të furnizojë punonjësit e frontit të parë më pajisje themelore për të luftuar pandeminë edhe gjatë stinës së dimrit.
Bëhet e ditur se numri i përgjithshëm i rasteve nga coronavirusi në Britani të Madhe u rrit në 437 mijë, ndërsa deri më tani kanë ndërruar jetë 42 mijë persona.
Deri më tani, sipas Worldometers rreth 33 milionë njerëz në botë janë diagnostikuar me COVID-19, ndërsa numri i viktimave është rreth një milion.
Vendi më i goditur në botë raportohet të jetë SHBA-ja me shtatë milionë raste gjithsej, pasuar me Indinë e cila i ka gjashtë milion të prekur dhe Brazili cili i ka regjistruar 4.7 milionë të infektuar. /Telegrafi/