Kryeministri i KosovësAlbin Kurti ka vendosur lule te varri i Sami Frashërit gjatë qëndrimit të tij në Stamboll.
Kurti ka pohuar se Sami Frashëri ka qenë ideolog i shquar dhe dijetar i ndritur, transmeton Telegrafi.
“Atdhetar, rilindas e mendimtar përparimtar. Nuk mund të përshkruhet mjaftueshëm me fjalë e të ketë aq epitete për ta bërë sa më të kuptueshme figurën e tij”, ka pohuar Kurti.
Më tej, ai ka shtuar se “Sami Frashëri është thesar kombëtar dhe personalitet që ka kontribuar jashtëzakonisht në mendimin politik, shoqëror e filozofik shqiptar”.
“Krijimtaria e tij është e lidhur ngushtë me idealet e lëvizjes kombëtare për çlirim, me nevojat e shkollës e të kulturës kombëtare, dhe nga idetë iluministe evropiane. Ai la një trashëgimi të pazëvendësueshme, e cila mbetet bashkëkohore ende sot. Mjafton të lexosh veprën e tij monumentale “Shqipëria ç’ka qenë, ç’është dhe çdo të bëhet”, për të kuptuar largpamësinë socio-politike dhe mendimin e mprehtë me shprehjet e thukëta. Një gur që ngulit e skalit të vërtetën dhe të drejtën në mendjen tonë”, pohon mes tjerash ai.
Kryeministri thotë se në ditëlindjen e Samiut, ai ka vizituar varrin e tij në Stamboll, ku edhe ka vendosur lule të freskëta, për ta kujtuar e nderuar atë.
“Para kësaj, në Ankara qëndruam në Qendrën Kulturore Shqiptare atje e cila përveçse mban emrin e tij, e nderon çdo ditë trashëgiminë e tij duke qenë vend që i bën bashkë shqiptarët e ku flitet e mësohet gjuha shqipe, ashtu siç na mësonte Samiu gjuhën përmes kombit, e kombin përmes gjuhës”, thotë Kurti.
Kryeministri shprehet më tej, se Sami Frashëri “la gjurmë, gjurmë të pashlyeshme, që ende sot, preken e përjetohen”.
“Një mërgimtar i arrirë, që s’e harroi kurrë vendin e tij. Shembull për kombin, shembull për mërgatën dhe frymëzim për çdokënd”./Telegrafi/
