Kryeministri i Kosovës, Albin Kurti u ka dërguar deputetëve të Kuvendit të Kosovës nga një dhuratë simbolike për fundvit.
Kjo u bë e ditur nga deputetja e Kuvendit nga radhët e PDK-së, Ganimete Musliu e cila nuk e ka pranuar atë.
Musliu përmes një video-inçizimi të postuar në rrjetin social në Facebook ka thënë se Kurti është shndërruar në një babadimër dhe siç tha ajo për një vit rresht është tallur me deputetët.
“Kurti ka dashur të ëmbëlsoi deputetët me nga një çokollatë dhe nga një zarf urimi për fundvit.
Albin Kurti i cili rolin e kryeministrit e ka shndërruar në babadimër, për një vit rresht u tall me Kuvendin e Kosovës dhe tentoj të poshtëroj e denigroj deputetet, paska zgjedhë që me para të qytetarëve të na dhuroj dhurata për vitin e ri.
Unë nuk mund të pranoj dhurata nga Albin Kurti i cili i la pa protezat invalidët e Ushtrisë Çlirimtare të Kosovës prandaj sot ja ktheva personalisht dhuratën”, ka thënë Musliu. /Telegrafi/
