Kryeminsitri i Kosovës, Albin Kurti, ka bërë të ditur se ka zhvilluar telefonatë me Sekretarin amerikan të Shtetit, Antony Blinken.
Në një shkrim në Twitter, Kurti ka thënë se është biseduar për pranimin e afganëve në Kosovë, duke shtuar se do t’iu ofrojë ambient të sigurtë.
Tutje u shpreh se aleanca mes Kosovës dhe Amerikës, është e palëkundur.
“Kosova është e nderuar të ofrojë një mjedis të sigurt për qytetarët afganë gjatë tranzicionit të tyre. Aleanca jonë me SHBA-në është e palëkundur dhe miqësia jonë po bëhet më e fortë”, ka thënë Kurti.
Të hënën gjatë ditës, ministri i Punëve të Brendshme të Kosovës, Xhelal Sveçla ka bërë të ditur se deri më tani në Kosovë janë strehuar përkohësisht 683 shtetas afganë.
Ministri u shpeh se përveç kampit Bechtel-Enka në Ferizaj, afganët tani po strehohen edhe në kampin ushtarak amerikan, Bondsteel. Aty, aktualisht janë strehuar 91 afganë.
Ardhja e qytetarëve të tjerë afganë do vazhdojë edhe gjatë kësaj jave.
Më herët, autoritetet kosovare kanë bërë të ditur se do të strehojnë rreth 2,000 shtetas afganë të cilët kanë punuar me Shtetet e Bashkuara dhe me shtetet anëtare të NATO-s.
Sipas ligjeve në fuqi, Kosova u ka dhënë qëndrim të përkohshëm deri në një vit.
Ata pritet të qëndrojnë përkohësisht në Kosovë derisa t’iu rregullohen dokumentacionet për t’u vendosur përfundimisht në Shtetet e Bashkuara ose në ndonjë shtet anëtar të NATO-s./Telegrafi/
Pleasure to speak w/ Sec. @ABlinken today. He expressed @POTUS’s appreciation for our support & coop. Kosova is honored to offer a safe & secure environment for Afghan citizens during their transition. Our alliance w/ the US is unwavering, & our friendship is growing stronger. pic.twitter.com/l6WQa29fYd
— Albin Kurti (@albinkurti) September 6, 2021