Kreu i Lëvizjes Vetëvendosje Albin Kurti ka vizituar sot kryetarin e ri të Komunës së Podujevës Shpejtim Bulliqi me të cilin ka biseduar rreth situatës me pandemi dhe planet e qeverisjes së re komunale.
Lajmi është bërë i ditur nga vetë kreu i Podujevës përmes një postimi në Facebook.
“Kryetarin Kurti, e njoftova rreth situatës me pandeminë në komunën tonë dhe masat e menjëhershme që kemi ndërmarrë për të shtuar kapacitetet për trajtimin e pacientëve të infektuar. Temë e bisedës ishin edhe vendimet e para që kemi marrë si qeverisje e re komunale dhe vendimet e ardhshme që janë në planin tonë për të mundësuar shërbime më të mira për qytetarë tanë. Kryetari Kurti na uroi për fillimin e punës dhe shprehu mbështetjen e tij të plotë për punët e mira që do të bëhen në qytetin tonë”, shkruan Bulliqi.
Ndryshe, Shpejtim Bulliqi u zgjodh kryetar i ri i Podujevës në zgjedhjet e jashtëzakonshme qysh në raundin e parë, duke i marrë kështu Lidhjes Demokratike të Kosovës bastionin e qeverisur nga kjo e fundit për njëzet vjet me radhë.
