Kryeministri i Republikës së Kosovës, Albin Kurti, ka pranuar telegram urimi nga Kancelari Federal i Austrisë, Sebastian Kurz, i cili e ka përgëzuar për zgjedhjen e tij si kryeministër, duke vlerësuar se Kosova është partner i rëndësishëm për Austrinë.
Në letrën e urimit thuhet se Kosova ka qenë gjithmonë vend me prioritet për Agjencinë Austriake për Zhvillim, duke premtuar për bashkëpunim më të mirë mes dy shteteve, transmeton Telegrafi.
“Që nga shpallja e Pavarësisë në vitin 2008, Kosova është përballur me sfida serioze politike, etnike, ekonomike dhe shoqërore. Kosova është partner i rëndësishëm për Austrinë dhe zhvillimi i marrëdhënieve tona të mira ka rëndësi të madhe për ne. Kosova ka qenë gjithmonë vend me prioritet për Agjencinë Austriake për Zhvillim dhe mund t’ju siguroj se do të vazhdojmë bashkëpunimin tonë të mirë”, thuhet në letrën e kancelarit Kurz drejtuar kryeministrit Kurti.
Në fund të letrës Kurz ka shkruar se mezi pret të punojë me Kurtin dhe ta mbështes integrimin e Kosovës në BE./Telegrafi/