Kryeministri në detyrë, Albin Kurti gjatë të mërkurës ka realizuar një vizitë në shkollën Model “Qamil Batalli”, në Prishtinë.
Kurti këtë vizitë e bëri bashkë me ministren në detyrë të Arsimit, Shëndetësisë, Teknologjisë dhe Inovacionit, Hykmete Bajramin dhe zëvendësministrin në detyrë, Jusuf Thaçi.
Ata takuan drejtorin e Shkollës Model “Qamil Batalli”, Liridon Maliqi, drejtoreshën e Drejtoratit të Arsimit të Komunës së Prishtinës, Shpresa Shala, drejtorin Televiz dhe Kryeproducentin, Faik Ispahiu, drejtoreshën Ekzekutive të “TOKA”, Jehona Gjurgjeala, mësuesit e arsimtarët dhe stafin vullnetarë i cili po e realizon mësimin online.
“Si Qeveri jemi shumë të kënaqur me punën që po bëhet. Nxënësit tanë kanë mundësinë e marrjes së mësimit nga një ekip shumë mirë i përgatitur. E gjithë kjo punë e madhe po bëhet vullnetarisht”, thuhet në komunikatën e lëshuar nga Zyra e Kryeministrit në lidhje me këtë vizitë.
Po ashtu bëhet e ditur se nga java e ardhshme mësimi do të filloj 8 orë në ditë. Tani për tani nxënësit mund të marrin mësimin në gjuhën shqipe, turke dhe atë boshnjake.
“Visuri Corona në vendin tonë kryesisht po luftohet nga vullnetarët. Mobilizimi i tyre në çdo fushë na jep shpresë për shprehinë e punës dhe solidaritetin shtetëror që po e ndërtojmë”, thuhet tutje në komunikatë. /Telegrafi/