Sami Kurteshi nga Lëvizja Vetëvendosje, ka thënë se raporti i institutit zviceran mbi vdekjen e Astrit Deharit, konstaton se ai është vrarë në Qendrën e Paraburgimit në Prizren.
Kurteshi përmes një shkrimi në Facebook ka shkruar se ky raport po mundohet të fshihet, transmeton Telegrafi.
“Pas gjithë këtyre, heshtjeve, fshehjeve dhe vonesave, tanimë përfundimisht është e qartë: Raporti për Astrit Deharin konstaton vrasjen e tij në Qendrën e Paraburgimit në Prizren. Këtë duan ta fshehin. E këtë nuk e fshehin dot. Prokurori Admir Shala vetëm po e kryen ‘punën’ e tij sipas porosisë së bosëve të tij kriminelë”, ka shkruar Kurteshi.
Ai ka thënë se vonesa në publikimin e raportit nga Instituti në Lozanë, nuk ka të bëjë me asnjë vështirësi teknike, por siç ka shkruar ai me fshehjen e gjurmëve.
“Vonesa në publikimin e raportit nga Instituti në Lozanë, nuk ka të bëjë me asnjë vështirësi teknike, por me fshehjen e gjurmëve, shkatërrimin dhe zhdukjen e dëshmive nëpër institucionet përgjegjëse dhe përgatitjen për arsyetim, fshehjen e urdhërdhënësve politikë, realizuesve operacional policorë, legjitimiuesve gjyqësorë e prokurorial, vrasësve ekzekutorë dhe, krejt në fund, arsyetuesve e mbuluesve mercenarë medial e analistë. Vrasjen tanimë nuk e mbulon asnjë salto „gjeniale“ e interpretimit gjuhësor me përkthim. Vrasja nuk mbulohet me fjalë”, vijon shkrimi i tij.
Ndryshe, gjatës javës së kaluar Prokuroria Themelore në Prizren ka pranuar raportin përfundimtar të ekspertizës për vdekjen e Astrit Deharit, i cili është kryer në Zvicër.
Prokurori, Admir Shala përmes një konference për media ka thënë se raporti nuk është hapur dhe se pasi të përkthehet në gjuhen shqipe, do të informohet opinioni për përmbajtjen e tij./Telegrafi/
