Besimtarët myslimanë festojnë mëngjesin e 9 korrikut festën e Kurban Bajramit. Kreu i Komunitetit Mysliman, Bujar Spahiu, iu lutet qytetarëve t’i shtrijnë dorën njëri-tjetrit dhe të rrezatojnë mirësi.
“Të dashur qytetarë, nesër, në Shqipëri dhe mbarë botën, është festa e Kurban Bajramit. Në këtë ditë ne përkujtojmë sakrificën e Ibrahimit (a.s), durimin e pa shembullt të Ismailit (a.s.), atë kohë vetëm një fëmijë, dhe dhembshurinë e nënës së tij heroike, Haxhires”, ka thënë Spahiu.
“Kurbani na dëshmon se sakrifica, durimi dhe dhembshuria njerëzore, janë punët më të pëlqyeshme te Zoti. Kush ka mundësi le të presë Kurban vetëm për Hir të Zotit, e kush nuk ka inshallah i mundësohet sa më shpejt”, ka shtuar Spahiu.
“Silluni mirë me njëri-tjetrin. Shtrini dorën e vëllazërimit ndërmjet jush. Duajeni njëri-tjetrin për hir të Zotit. Jini mbështetje për të varfrit. Bëhuni inkurajues për të sëmurët, dhe rrezatoni shpresë e gëzim te fëmijët. Ju dëshiroj paqe, begati e mirësi në familjet tuaja! Gëzuar Kurban Bajramin!”, është mesazhi i kreut të KMSH-së. /Telegrafi/
