Bordi i Asociacionit të Komunave të Kosovës (AKK), ka reaguar ndaj deklaratave të Kryeministrit Albin Kurti, i cili duke folur për dorëzimin e listave për paga nga komunat tha se “bojkoti që të mos dorëzohen listat, s’është thjesht politikë anti-qeveritare, por është politike antishtetërore”.
Sipas AKK-së, kjo qasje nuk i duhet Kosovës e as momentumit, “aq më tepër qasje që polarizon panevojshëm shoqërinë tonë”.
“Po ashtu Ju rikujtojmë që punëdhënës i punëtorëve komunalë është Komuna dhe jo Qeveria kurse Ministria e Financave vetëm proceson pagesat sepse vendimmarrës për buxhetet komunale janë vetë komunat”, thuhet në reagimin e kryetarëve të komunave.
“Si mund të bëjnë politikë anti shtetërore Kryetarët e Komunave ku secili nga ata ka një veprimtari të begatë në shërbim të atdheut dhe kombit me dekada të tëra e që shumë nga ata edhe luftëtar lirie si dhe familjar dëshmorësh që kanë derdhur gjakun për shtetin e Kosovës”.
Tutje, thuhet se është fyerje të cilësohen kryetarët e komunave si anti shtetit të Kosovës, ndaj i kanë kërkuar kryeministrit që të kërkojë falje.
“Pra, Kryetarët e Komunave kanë sakrifikuar shumë për shtetin, duke mos kursyer asgjë. Nuk ka asnjë logjikë që një njeri që ka luftuar për vendin e vetë të punojë kundër shtetit. Kryetarët e Komunave vetëm po kërkojnë ligjshmëri dhe funksionim të ndarë mes niveleve të qeverisjes në Kosovës në harmoni me Kushtetutën”.
“Prandaj, Kryeministër Kurti e ke obligim moral dhe institucional t’u kërkosh falje Kryetarëve të Komunave dhe mos të nxitësh edhe situata tjera për të cilat Kryetarët nuk kanë asnjë përgjegjësi”, thuhet më tej në reagim. /Telegrafi/
