Kryeprokurori i Shtetit, Aleksandër Lumezi, ka zhvilluar takim virtual me Ambasadorin e Shteteve të Bashkuara të Amerikës në Kosovë, Jeff Hovenier, ku është biseduar për forcimin e sundimit të ligjit në vendin tonë.
Gjatë bisedës, kryeprokurori Lumezi, duke e vlerësuar lart kontributin dhe ndihmën e Shteteve të Bashkuara të Amerikës dhënë institucioneve të Republikës së Kosovës, veçmas për ato të drejtësisë, e njoftoi konkretisht ambasadorin Hovenier për punën, të arriturat, sfidat dhe objektivat e Prokurorit të Shtetit.
Sipas komunikatës, pjesë bisedës ishte edhe angazhimi i Prokurorit të Shtetit në luftimin e korrupsionit, krimit të organizuar dhe krimeve të tjera të rënda.
“Në këtë kontekst, palët patën diskutime të frytshme dhe konstruktive për nevojën e forcimit të sundimit të ligjit, administrimin efikas të drejtësisë dhe konsolidimin e pavarësisë institucionale”, thuhet në komunikatë, transmeton Telegrafi.
Sipas komunikatës, ambasadori Hovenier vlerësoi progresin e arritur në sistemin e drejtësisë dhe siguroi Kryeprokurorin e Shtetit që SHBA-të do të vazhdojnë ta mbështesin sistemin prokurorial.
Kryeprokurori i Shtetit dhe Ambasadori i SHBA-së në Kosovë, shprehën vullnetin e përbashkët për të punuar ngushtë në të gjitha çështjet. /Telegrafi/