Kryetari i Partisë Demokratike të Kosovës, Memli Krasniqi e ka quajtur lajm të mirë lirimin e tre policëve që ishin arrestuar nga forcat serbe brenda territorit të Kosovës.
Krasniqi po ashtu ka falënderuar miqtë ndërkombëtarë që janë angazhuar për lirimin e tyre, transmeton Telegrafi.
“Lirimi i tre policëve nga mbajtja arbitrare në Serbi – Rifat Zekës, Beqir Sefës e Shemsi Mustafës, megjithëse mjaft i vonuar, është lajm i mirë për familjet e tyre dhe për qytetarët e shtetin tonë. Falënderoj të gjithë miqtë tanë ndërkombëtarë, të cilët u angazhuan dhe luajtën një rol vendimtar në këtë process”, thotë ai.
Kreu i PDK-së, shton tutje se tani është radha për shtensionimin e situtaës në pjesën veriore.
“Tani, radha është për shtensionimin e situatës në pjesën veriore të vendit dhe për rikthimin e normalitetit atje, përmes veprimeve të matura dhe të përgjegjshme politike”, është shprehur ai.
Rifat Zeka, Beqir Sefi e Mustafë Shemi, ishin arrestuar më 14 qershor nga forcat serbe brenda territorit të Kosovës, ndërsa sot Gjykata në Kralevë mori vendim për lirimin e tyre.
Arrestimi i tre policëve kishte nxitur reagime të shumta në vend, ku ishte kërkuar lirimi i menjëhershëm dhe pa kushte.
Lirimin e tre policëve e kanë kërkuar Bashkimi Evropian dhe Shtetet e Bashkuara të Amerikës. /Telegrafi/
