Komisioni Qendror i Zgjedhjeve ka marrë vendim që dy vendvotime të mos përfshihen në rezultatin e zgjedhjeve të parakohshme parlamentare që u mbajtën më 14 shkurt 2021.
Kështu u mor vendim në mbledhjen e radhës së KQZ-së, ashtu siç rekomandoi Qendra e Numërimit dhe Rezultateve, për shkak se siç u tha, në këto vendvotime kishte mospërputhje mes fletëvotimeve dhe nënshkrimeve.
Kryeshefi i Sekretariatit të KQZ-së, Burim Ahmetaj, tha se rekomandojnë që të mos përfshihen këto dy vendvotime në rezultatin përfundimtar.
“Kemi dy raste, ku edhe pse janë rinumëruar, prapë kanë përfunduar në auditim. Është fjala për një vendvotim në Vushtrri, ku edhe pas verifikim, rezulton se janë 5 fletëvotime më shumë se nënshkrime. Edhe në Mitrovicën e Veriut pothuajse është i njëjti rast, vetëm se janë 10 fletëvotime më shumë sesa nënshkrime. Rekomandimi është të mos përfshihen në rezultatet përfundimtare. Ndryshe, gjithë materialet e tjera janë të procesuara në bazën e të dhënave. Në gjendjen që janë, ato vendvotime nuk mund të procedohen si të rregullta”, tha Ahmetaj.
Në mbledhjen e KQZ-së, u mor vendimi që këto vendvotime të mos përfshihen në rezultatin përfundimtar. /Telegrafi/
