Albert Krasniqi nga Demokracia në Veprim, në intervistën dhënë Telegrafit ka thënë se raundi i dytë i zgjedhjeve lokale në Kosovë, ishte më i miri i organizuar deri sot nga Komisioni Qendror i Zgjedhjeve (KQZ). Sipas tij, inkurajuese është se në balotazhin e djeshëm nuk është raportuar për parregullsi të mëdha.
Sa i përket problemeve të shfaqura në organizimin e këtij procesi, ai tha se ende mbetet problem trajnimi i komisionarëve si dhe informimi më i mirë i votuesve se si të votohet.
“KQZ ka filluar të bëjë një përgatitje më të mirë dhe ta merr më me përgjegjësi punën e saj. Problemet që i kanë pasur, vazhdimisht kishin të bëjnë me trajnimin e komisionarëve, pasi mënyra e numërimit ka bërë që procesi zgjedhor të jetë i stërzgjatur. KQZ duhet ta ketë qendrën e vet të trajnimeve po ashtu edhe votuesit duhet t’i vetëdijesoj se si të votojnë”, shtoi tutje Krasniqi. /Telegrafi/
