Ministri i Jashtëm grek, Nikos Kotzias, në një intervistë për agjencinë shtetërore të lajmeve “AMNA” e ka quajtur tepër pozitiv dhe cilësor tekstin e konkluzioneve të presidencës sllovake të Këshillit të Çështjeve të Përgjithshme të BE-së, ku çështjet kryesore ishin integrimi i Shqipërisë, i Maqedonisë dhe i Turqisë.
Ai ka shfaqur kënaqësinë e tij për miratimin e pozicionimeve greke në lidhje me Shqipërinë, sidomos të çështjeve që lidhen me minoritetin grek dhe pronat e tij, si dhe të marrëdhënieve të mira fqinjësore.
Sipas Kotziasit, në kontrast me raportet e mëparshme që fokusoheshin ekskluzivisht në reformën e gjyqësorit, tashmë janë vendosur të pesta prioritetet vendimtare, si kushte thelbësore për hapjen e negociatave për anëtarësim në BE, si promovimi i reformës gjyqësore, lufta kundër krimit të organizuar dhe, natyrisht, respekti për pakicat.
“Shqipërisë i vihet në dukje”, thekson Kotzias, “nevoja për të mbrojtur të drejtat e minoriteteve në të gjithë territorin, e jo vetëm në zonat minoritare, dhe për më tepër kjo është e lidhur për herë të parë drejtpërdrejt me të drejtat e pronës”.
Kreu i diplomacisë greke ka thënë gjithashtu se është bërë një qasje e kujdesshme për sa i përket retorikave nacionaliste të muajve të fundit, duke i veçuar ato vetëm te disa elementë në qeveri dhe duke i dhënë rëndësi faktorit të fqinjësisë së mirë me Shqipërinë, për më tepër kur edhe në ish-Republikën Jugosllave të Maqedonisë jetojnë një numër i madh shqiptarësh.
“Ne duam europianizimin e Shqipërisë dhe pranimin e saj në BE, jo duke e mbajtur me hatër, por duke respektuar kriteret e vendosura për të gjithë”, ka thënë Kotzias, duke shtuar se “Greqia ka dëshirën e mirë dhe, kur t’i kërkohet, do të ndihmojë Shqipërinë të përmbushë këto kërkesa, duke vazhduar edhe dialogun për çështjet dypalëshe ende të pazgjidhura”. /Top Channel/
