Eksperti i pavarur për demarkacionin, Florim Isufi, ka thënë se gjatë konsultimit të hartave, së bashku me kolegun Shpejtim Bulliqi, kanë gjetur bazën hartografike të ish-Jugosllavisë e cila, sipas tij, mbetet më e sakta e mundshme.
“Aty kemi gjetur të gjithë kufijtë e të gjitha krahinave. Është album i madh ushtarak, tejet voluminoz me të gjithë kufijtë, përveç atyre vendeve të cilat kanë pasur probleme në mes të republikave”, ka thënë ai në “Rubikon”, duke shtuar se Kosova nuk ka qenë në listën e shteteve që kanë pasur ngecje të tilla, transmeton Koha.net.
Sipas Isufit, ka mjaftuar që të konsultohet ai material dhe të shihen të gjitha dyshimet që mund të ekzistojnë mbi çështjen e kufijve.
Sipërfaqja e Kosovës del të jetë e lëvizshme nëpër raporte e harta të ndryshme, ka thënë Isufi, të cilën e cilëson si mungesë joserioziteti nga vetë ai dhe kolegët e tij.
“Asnjë detaj nuk e kemi gjetur se është matur sipërfaqja e Kosovës. Informatën për sipërfaqen e saj e kemi marrë diku dhe nuk ekziston asnjë burim se ku e kemi marrë atë”, ka theksuar Isufi.