Gjatë ditës së martë, një nga ‘billboard’-ët më të mëdhenj në “Times Square” të New Yorkut, ka shfaqur imazhin e këngëtares shqiptare me renome botërore, Dua Lipa.
Bëhet fjalë për reklamën e sponsoruar nga “Spotify”, e cila është bërë me qëllim promovimin e saj për çmimin “Artistja e re më e mirë” në mbrëmjen më të madhe të ndarjes së çmimeve të muzikës në botë, “Grammy Awards”.
“Nga Kosova në Brtianinë e Madhe, për tu nominuar për çmimin Artistja e re më e mirë”, shkruhej në ‘billboard”-in gjigant të New Yorkut.
Të lumtur nga ky promovim që i është bërë Kosovës në sheshin “Times Square” kanë qenë shqiptarë të shumtë, të cilët kanë shpërndarë me të madhe imazhin në rrjetet sociale.
E një gjë të tillë e ka bërë edhe vet kryeministri i Kosovës, Ramush Haradinaj.
Ai ka publikuar imazhin e ‘billboard’-it të Duas në rrjetin social Facebook, teksa në statusin e tij ka falënderuar këngëtaren për këtë promovim që i bënë Kosovës.
“Dua Lipa në kulmin e sukseseve të saja, në sheshin kryesor të New York, Time Square, pjesë e kampanjës nga rrjeti muzikor Spotify: “Nga Kosova në Britani të Madhe në nominimin për ‘Artisten e re më të mirë”. Faleminderit Dua”, janë fjalët e kryeministrit Haradinaj në Facebook.
Edhe Dua vet është ndjerë e lumtur me prezantimin e saj në këtë format, teksa falënderuar platformën e madhe të muzikës, “Spotify”, që ia mundësuan këtë. /Telegrafi/
