SHBA-ja dhe Kina mund të jenë forcë dominuese sa i përket medaljeve olimpike, por këto dy shtete nuk mund të krenohen sa i përket medaljeve që kanë fituar në krahasim me popullsinë që kanë.
Kosova, Zelanda e Re, Mongolia dhe Australia janë forcë dominuese kur medaljet e fituara maten për kah numri i banorëve, shkruan medalspercapita.com.
Kosova është në krye të listës në saje të Majlinda Kelmendit, e cila fitoi medaljen e artë olimpike në kategorinë 52 kilogram në xhudo.
Kosova ka vetëm 1.8 milion banorë, përkatësisht i bie një medalje për kaq banorë sa ka shteti ynë, transmeton Telegrafi.
Sllovenia me një medalje renditet e dyta, ndërsa Zelanda e Re me dy medalje zë vendin tretë.
Australia është e gjashta në tabelë me tetë medalje. Kjo do të thotë se ky shtet ka fituar një medalje për çdo 2,972,646 australianë.
SHBA-ja dhe Kina janë në fund të kësaj liste. Amerika ka 324 milionë banorë dhe kjo do të thotë se amerikanët kanë një medalje për çdo 15,305,658 amerikanë.
Kina numëron 1.3 miliard banorë, përkatësisht ka një medalje për çdo 91,414,666 njerëz. /Telegrafi/