Të papriturat nuk mungojnë asnjëherë me Korenë e Veriut. Pikërisht atëherë kur u duk se paqja është gjëja më e afërt ne horizont dhe se retorikat e prag-luftës ishin lënë pas krahëve, Peniani paralajmëroi Shtetet e Bashkuara të Amerikës (SHBA) të heqin dorë nga presionet dhe kërcënimet ushtarake, të cilat mund ta cënojnë sipas tij atmosferën paqësore të kësaj periudhe.
Një zëdhënës i ministrisë së jashtme u shpreh se Amerika po e provokon qëllimisht veriun me sugjerimin që sanksionet ndaj vendit komunist të mos hiqen derisa ai të heqë dorë nga armët bërthamore.
Presidenti amerikan, Donald Trump dhe lideri koreano-verior Kim Jong-un pritet të takohen brenda disa javësh, përballja e parë kjo mes udhëheqësve të të dy vendeve, përcjell Telegrafi.
Një hap i rëndësishëm drejt uljes së tensioneve u arrit muajin e kaluar me pajtimin e liderit koreano-verior dhe homologut të tij jugor për çarmatosjen nukleare të gadishullit.
Në samitin historik u vendos po ashtu që brenda vitit të firmoset traktati i paqes, i cili do t’i japë fund luftës mes dy koreve, të mbyllur në 1953-shin vetëm me firmosjen e një armëpushimi. /Telegrafi/