Për kultivim të perimeve dhe luleve në ballkon nuk ju nevojiten shpenzime të mëdha as ndonjë shkathtësi e veçantë, por vetëm vullneti, ndërkaq angazhimi shpaguhet shumëfish.
Për kultivim të luleve në dritare dhe ballkon apo perimeve, të cilat më vonë do t’i kultivoni në një kopsht të vogël apo madje edhe në sënduk, ju nevojiten vetëm vegla të thjeshta:
1. Sënduk të cekët apo ambalazh kartoni të vezëve,
2. Dhe të imët të blerë në dyqane të luleve,
3. Fara të bimës që dëshironi ta mbillni
4. Gota jogurti me vrimë për rrjedhje të ujit.
Bimët të cilat kërkojnë temperatura të larta do t’i mbillni në ambalazh kartoni. Këto janë: lakra, lulelakra, sallata, selinoja, lulet zbukuruese, të cilat mund t’i mbani brenda në shtëpi, transmeton Telegrafi.
Kur t’i zhvillojnë dy fletë, do t’i mbillni në gota apo sëndukë në distanca më të mëdha.
Pastaj mbillni bimë të reja. Më vonë mbillni domate, speca, si edhe lule zbukuruese që nuk i rezistojnë dimrit. Kur ngrohet koha fidanët mbillen në vend të hapur.
Në ambalazh kartoni për vezë qitni dheun. Mbushni mirë të gjitha vrimat.
Dheun në gropa lehtë shtypeni dhe plotësoni aty ku ka më pak.
Pastaj me gisht bëni vrimën në çdo “shtëpizë” dhe qiteni një farë. Kur të mbillni të gjitha “shtëpizat”, edhe njëherë qitni dhe sipër.
Pas mbjelljes me ujë të vakët lehtë lageni dheun. Gjatë kultivimit kujdesuni që fara e mbjellë, më vonë bimë të reja, kurrë të mos jenë të paujitura.
Varësisht nga lagështia, drita dhe ngrohja farërat do të mbijnë pak a shumë përnjëherë. Bimët e shëndetshme që kanë zhvilluar nga 2 fletë lehtë mund t’i nxirrni nga “shtëpiza” bashkë me dheun dhe t’i mbillni në gota.
Se sa fidanë do të kultivoni varet nga hapësira që keni. Mirëpo, pa marrë parasysh sasinë e bimëve të mbira, duhet siguruar: dritë, lagështi dhe ajër (oksigjen).
Për mbirje të farërave nevojitet temperatura prej 13 – 18 gradësh. Kujdesuni që dheu të mos thahet. Ujitni me masë bimët.
Fidanët e shëndetshëm të domateve mund t’i kultivoni në ballkon në thasë plastike, të mbushur mirë me dhe kopshti. Në thasë bëni 2-3 vrima për rrjedhje të ujit. Një herë para lulëzimit mund t’i ushqeni bimët (t’i spërkatni fletët me folifertil).
Kini kujdes që fidanët të mos i mbani në temperaturë shumë të lartë apo në hapësirë tepër të errët.
Kastravecët nuk e përballojnë rimbjelljen dhe duan temperaturë më të lartë, andaj mbillen vetëm në vend të përhershëm, më vonë në pranverë.
Domatet dhe specat janë kultura të cilat gjithashtu kërkojnë temperatura më të larta, mirëpo fidanët mund t’i kultivoni më herët në hapësirë të mbyllur. /Telegrafi/