Pjesëtarë të Policisë së Kosovës, FSK-së, zhytës dhe qytetarë të shumtë edhe sot në lumin Lepenc kanë vazhduar kërkimet për trupin e policit të zhdukur, Armend Trena.
Zëdhënësi i Policisë së Kosovës për rajonin e Ferizajt, Agim Gashi ka treguar se ekipet e kërkim shpëtimit, të përbëra prej Policisë, pjesëtarëvë të FSK-së dhe AME-së deri tani kanë kontrolluar shtatë ura në Lepenc, por pa asnjë rezultat për trupin e policit Armend Trena, i cili konsiderohet i zhdukur nga mbrëmja e 28 prillit.
Gashi ka thënë që për momentin ka reshje të mëdha dhe ekipet po pushojnë për të vazhduar tutje sapo të përmirësohen kushtet atmosferike.
“Kërkimet kanë filluar sot në ora 9 në mëngjes, dhe kanë vazhduar deri në këto momente ku për pak kohë janë ndërpre kërkimet për shkak të kushteve jot ë mira atmosferike dhe reshjeve të shiut. Janë kontrolluar deri më tani shtatë ura, të cilat kanë qenë këtu në Lepenc do të thotë, por fatkeqësisht nuk kemi hasur në asgjë. I kemi edhe dy ura dhe do të vazhdojmë edhe ato t’i kontrollojmë. Dje dhe sot janë kontrolluar shtatë ura. Për momentin është tu ra shumë shi I madh dhe ëpr momentin janë tu pushu zhytësit edhe pjesëtarët e tjerë dhe po varet krejt prej kushteve atmosferike dhe nëse nuk ka rezultat sot nesër prapë në ora 9 fillojmë”, ka thënë zëdhënësi Gashi për Kosovapress.
Policët Armend Trena dhe kolegu i tij Malsor Dashi u aksidentuan javën e kaluar afër lumit Lepenc në Hanin e Elezit. Trupi i pajetë i Malsor Dashit ishte gjetur pas kontrollimit të një ure pas pesë ditë kërkim, dhe ai është varrosur me ceremoni shtetërore.
Ekipet ende po punojnë në gjetjen e trupit të Trenës që dyshohet po ashtu se ka rënë në lum pas aksidentit. /Telegrafi/