Kryetari i qytetit të Shkupit, Koce Trajanovski sot u ka ikur pyetjeve të gazetarëve në lidhje me ftesën për kryetarin e komunës Qendër, Andrej Zhernovski nga PSP lidhur me projektin “Shkupi 2014”, transmeton Telegrafi Maqedoni.
Nga komuna Qendër nga ana tjetër kanë theksuar se tërë dokumentet dhe raportet e revizionit për keqpërdorime dhe shkelje ligjore për këtë projekt i ishin dërguar Prokurorisë Publike që para tre viteve, por ky institucion që atëherë siç thuhet ka heshtur dhe nuk e kishte proceduar rastin.
Dragan Malinovski anëtar i komisionit për revizionin e projektit “Shkupi 2014” për TV21 ka deklaruar se janë bërë shumë parregullsi. Ai ka thënë se Komuna Qendër ka pësuar dëm prej 8 milion eurove. Ndërsa sipas një hulumtimit të realizuar “Shkupi 2014 nën thjerrëz” nga rrjeti hulumtues BIRN, bazuar në dokumente zyrtare, ky projekt deri tani ka kushtuar mbi 630 milionë euro, edhe pse me promovimin e tij në vitin 2010 ishin planifikuar mbi 80 milionë euro./Telegrafi/