Në Komitetin e Parlamentit Evropian për Liritë Civile, Drejtësi dhe Çështje të Brendshme sot do të jetë në rend dite në diskutimi për liberalizimin e vizave për Kosovën – marrëveshja trepalëshe.
Në njoftimin e Parlamentit Evropian bëhet e ditur se çështja e vizave për Kosovën do të jetë në rend dite në Komitetin për Liritë Civile, Drejtësi dhe Çështje të Brendshme, raporton Telegrafi.
Votimi pritet të bëhet nga ora 12:30 deri në orën 13:00.
E se liberalizimi i vizave do të jetë në agjendën e Komitetit për Liritë Civile, Drejtësi dhe Çështje të Brendshme e kishte bërë të ditur ditë më parë euro-deputeti Thijs Reuten, përmes një shkrimi në Twitter.
Reuten kishte bërë thirrje për votim.
“Pas marrëveshjes së shumëpritur me shtetet anëtare të BE-së për liberalizimin e vizave për Kosovën dhjetorin e kaluar, ne do të vazhdojmë me ritmin në Parlamentin Evropian. Votoni në komision këtë të enjte!”, kishte shkruar Reuten.
Duhet theksuar se ambasadorët e vendeve anëtare të BE-së gjatë takimit në Bruksel në dhjetor kanë miratuar marrëveshjen e arritur më parë mes Këshillit të BE-së dhe Parlamentit Evropian për liberalizimin e vizave për Kosovën.
Tani marrëveshja duhet të votohet në Komisionin për liritë qytetare, drejtësi dhe çështje të brendshme (LIBE) në Parlamentin Evropian, e më pas edhe në seancën plenare.
Pas kësaj konfirmohet nga Këshilli i BE-së.
Ndërkaq, pas përfundimit të këtyre procedurave, qytetarët do të mund të udhëtojnë drejt BE-së më së largu më 1 janar 2024.
Kosova, aktualisht, është vendi i vetëm në Ballkanin Perëndimor, qytetarët e të cilit nuk mund të lëvizin lirshëm në këtë zonë. /Telegrafi/
After the long awaited agreement with EU member states on visa liberalization for Kosovo last December, we will keep up the pace in the European Parliament. Vote in committee👇🏼this Thursday! 🇪🇺🤝🇽🇰 https://t.co/vBd1YjybCo
— Thijs Reuten 🇪🇺🌹 (@thijsreuten) January 9, 2023