Përdorimi i ilaçit Remdesivir për të trajtuar raste të rënda të COVID-19 në Bashkimin Evropian është aprovuar nga Komisioni Evropian.
Sipas mediave të huaja, përcjell Telegrafi, Komisioni Evropian ka thënë se ka aprovuar përdorimin e Remdesivir për të trajtuar raste të rënda të COVID-19 në Bashkimin Evropian.
“Ne nuk do të lëmë asnjë gur pa lëvizur në përpjekjet tona për të siguruar trajtime efikase ose vaksina kundër coronavirusit”, ka thënë Stella Kyriakides, komisare e shëndetit e BE-së, në një deklaratë për shtyp.
Miratimi nga krahu ekzekutiv i BE-së, i lëshuar të premten, ishte hapi i fundit që ilaçi të merrte dritën jeshile.
Siç thuhet më tej, ky është ilaçi i parë që fiton një aprovim të tillë për t’u përdorur në BE.
Një lajm i tillë pason një rekomandim nga Agjencia Evropiane e Barnave (EMA), e cila javën e kaluar tha se ilaçi – i shitur nën emrin Veklury – duhet të aprovohet për trajtimin e pacientëve COVID-19 mbi moshën 12 vjeç, të cilët kërkojnë oksigjen shtesë.
Remdesivir, prodhuar nga ndërmarrja bioteknike amerikane Gilead Sciences, fillimisht u zhvillua si një trajtim për Ebola, por ai pati pak efekt.
Ndërkohë një studim ndërkombëtar në fund të prillit me mbi 1000 pjesëmarrës tregoi se Remdesivir mund të zvogëlojë kohën e nevojshme për pacientët COVID-19 të shërohen mesatarisht nga 15 në 11 ditë. /Telegrafi/