Komisionerja e Agjencisë për Informim dhe Privatësi, Krenare Sogojeva-Dërmaku ka folur për gjobën e shqiptuar ndaj Partisë Socialdemokrate (PSD) të drejtuar nga Dardan Molliqaj. Ajo mohon interferimet e mundshme politike për këtë vendim.
Sogojeva-Dërmaku në emisionin “Përballje”, me kryeredaktorin Muhamet Hajrullahu në Telegrafi.com ka thënë se një vendim i tillë nuk ka të bëjë aspak me ndonjë ndikim politik ndaj institucionit.
“Agjencia për Informim dhe Privatësi e ka dëshmuar pa anshmërinë e saj sepse ne kemi dënuar edhe shumë institucione tjera publike përfshirë Komunën e Podujevës që udhëhiqet nga Lëvizja Vetëvendosje. Pastaj kemi dënuar Agjencinë e Inteligjencës për mosdhënie të qasjes, Ministrinë e Jashtme, shumë komuna tjera përfshirë së fundmi edhe atë të Gjilanit, kështu që është jo e drejt që të vihet në dyshim apo të konsiderohet e njëanshme Agjencia”.
Ajo thotë se çdokush ka të drejtë të shprehet por kjo nuk do të ndikojë në vendimet profesionale të Agjencisë për Informim dhe Privatësi.
Sogojeva-Dërmaku thotë se në rastin e PSD-së, inspektorët me të dalë në vendin e ngjarjes kanë hasur se listat me të dhëna të qytetarëve po hidheshin në shporta të mbeturinave.
“Ato të dhëna janë vendosur në një vend të sigurt, e më pas kemi lëshuar urdhër ndaj Policisë për të shkatërruar ato të dhëna”.
Partia Socialdemokrate kishte paditur Agjencinë për Informim dhe Privatësi, pas dënimit me 20 mijë euro.
Ndryshe, PSD muaj më parë përmes një aksioni simbolik, pati vendosur para ndërtesës së Qeverisë së Kosovës 205 mijë nënshkrimet e peticionit të vitit 2016 kundër marrëveshjes për Asociacionin e komunave me shumicë serbe./Telegrafi/