Telegrafi

Komentimi i jashtëzakonshëm nga Peter Drury bëhet viral: Djali i vogël nga Rosario sapo është ngritur në galaktikë, ky ekip bëhet i pavdekshëm

Romak Zeqiri

Peter Drury është një nga komentatorët më të famshëm në botë dhe ai ka komentuar edhe finalen e Kupës së Botës mes Argjentinës dhe Francës.

Ka qenë një finale e jashtëzakonshme që ka bërë miliona njerëz të jenë në ethe me një fund sa emocionues aq edhe spektakolar.

Komentatori anglez Peter Drury ka dhënë një komentim historik në fundin e finales, komentim që është bërë viral në rrjetet sociale.

55-vjeçari komentoi me aq emocion e pasion duke nxjerr fjalë të pavdekshme nga goja e tij dhe kjo ka bërë që video të shpërndahet jashtëzakonisht shumë në rrjetet sociale.

“Montiel… Argjentina, kampione e botës. Përsëri. Më në fund. Dhe kombi do të kërcejë tango gjatë gjithë natës. 36 vjet më parë që nga Maradona dhe Meksika, këtu më në fund është ekipi i ri i të pavdekshmëve të një kombi. Scaloni do të jetë i destinuar, Messi do të jetë i shenjtë”, tha Drury në momentin që Argjentina u shpall kampione e botës.

Komentatori britanik vazhdoi me tjera fjalë emocionuese kur kamera po shfaqte Lionel Messin duke u përshëndetur me tifozët argjentinas.

“Lionel Messi ka shtrënguar duart me parajsën. Djali i vogël nga Rosario, Santa Fe, sapo është ngritur në parajsë. Ai ngjitet në një galaktikë të tijën. Ai ka momentin e kurorëzimit dhe sigurisht nuk është vetëm. Dhe dikush të ndjen për Mbappe, i cili shënoi një hat-trick në finalen e Kupës së Botës dhe humbi. Si mund të jetë kjo?”, deklaroi Drury.

Argjentina dhe Franca luajtën baras 3-3 pas 120 minutash lojë, derisa në penallti më të saktë u treguan argjentinasit pasi fituan me rezultat 4-2. /Telegrafi/