Kombëtarja e Shqipërisë me 31 gusht do të luajë në një miqësore ndaj Katarit, ndërsa me pesë shtator do të luajnë ndaj Maqedonisë në kuadër të kualifikimeve për Botërorin ‘Rusia 2018’.
Tashmë të gjithë lojtarët e Kombëtares janë mbledhur dhe me këtë rast janë vizituar nga hoxha i Tiranës, Ahmed Kalaja.
“Me vëllezërit e mirë çaji shijon më shumë edhe urimet ngjisin më shumë”, ka shkruar Kalaja në Facebook.
Por, kjo nuk është hera e parë që hoxha bëhet teme e mediumeve në lidhje me Kombëtaren e Shqipërisë.
Pothuajse një vit më parë Kalaja kishte reaguar ashpër ndaj fjalëve të presidentit të Federatës Shqiptare të Futbollit, Armand Duka, se lojtarët nuk kanë nevojë të shkojnë në xhami dhe kishë të falen me simbole të skuadrës.
“Mendoj se nuk ka asgjë të keqe, përkundrazi mendoj se futbollistët ndihen më të plotë, më të motivuar për të fituar një ndeshje, pasi vajtja në xhami është forcë shpirtërore dhe fizike, shpesh na ka munguar shpresa për të mos u bërë pesimist po për të luftuar deri në fund për fitore”, kishte thënë Kalaja para një viti. /Telegrafi/
