Komandanti i Qendrës për Studime Universitare, Albion Ajvazi ka uruar kadetët e diplomuar, duke thënë se gjatë katër viteve të studimeve ata kanë treguar disiplinë dhe përkushtim.
Ajvazi ka thënë se sot është ditë e veçantë në kalendarin e FSK-së, ku shënojnë diplomimin e 15 kadetëve, transmeton Telegrafi.
“Sot është datë e veçantë në kalendarin e Forcës Sigurisë së Kosovës, kur ne po shënojmë diplomimin e 15 oficerëve të rinj, programi i studimeve është sfidues dhe kërkon sakrificë, durim dhe gatishmëri”, është shprehur ai.
Tutje, ai ka shtuar se programi i studimeve ka qenë rigoroz.
“Programi është rigoroz dhe shumë i ngjeshur, nga stërvitjet e hershme të mëngjesit dhe studimet në orët e vona të natës, përgjatë 4 viteve, kadetët kanë demonstruar se janë të vendosur për arritjen e standardeve ushtarake, dhe se janë të përkushtuar për sukses”, ka pohuar ai.
Tutje, ai ka shtuar se është krenar që ka shërbyer gjatë kësaj kohe. /Telegrafi/
