Jurgen Klopp nuk kënaqet lehtë, madje edhe atëherë kur skuadra e tij fiton thellë ndaj rivalëve më të mëdhenj në Ligën Premier.
Trajneri gjerman këtë të premte ka folur pas fitores së Liverpoolit ndaj Manchester United, duke mos u ndarë i kënaqur me disa gjëra që ka parë në atë ndeshje.
Ai ka thënë se në fitoren e arritur në “Old Trafford”, vendasit kishin shumë raste të mira.
“United kishte raste të qarta, të cilat ne ua dhuruam. Nuk duhet t’i besojmë fatit apo Alissonit. Mund të kishim bërë më mirë. Folëm në pushimin mes pjesëve, megjithëse po fitonim 4-0”.
“Ne duhet të përmirësohemi, e dimë. Bota kështu është: fiton 5-0 në fushën e United dhe gjithçka është perfekt. Epo, nuk ishte”.
“Duhet të përmirësohemi në stabilitetin e mbrojtjes, kur kundërshtari ka topin. Nuk ka arsye të rrezikojmë nëse i bëjmë gjërat mirë. Ka ende vend për përmirësim”, deklaroi gjermani.
Liverpooli mban pozitën e dytë në Ligën Premier me 21 pikë. /Telegrafi/