Përfaqësuesi i Kolegjiumit të kirurgëve, Arbër Morina në një intervistë për Telegrafin me Elfije Boletinin ka folur për vazhdimin e grevës të kirurgëve të Qendrës Klinike Universitare të Kosovës (QKUK).
Morina tha se kërkesa e tyre ka qenë respektimi i kuadrove profesionale me kuotën e respektuar me ligjin e Republikës së Kosovës.
Ai tha se me anë të grevës ata duan të paralajmërojnë Qeverinë e Kosovës, se projekt propozimi i ligjit për paga është i gabuar dhe si i tillë nuk mund të kalojë.
“Po përfundon java e pestë e grevës së kirurgëve dhe specialistëve të Republikës së Kosovës përfshirë dhe Ortopedinë. Kërkesa jonë është bërë e ditur qysh në fillim të grevës. Kërkesa jonë ka qenë respektimi i kuadrove tona profesionale me kuotën e respektuar me ligjin e Republikës së Kosovës. Me fillimin e grevës kemi pasur për qëllim që t’i paralajmërojmë mediat, Qeverinë e Kosovës që ky ligj dhe ky projekt propozim i ligjit për paga është i gabuar dhe si i tillë nuk mund të kalojë, sepse nuk përfaqëson denjësisht interesat e një shtrese më të shkolluar të këtij shteti”, ka thënë Morina.
Sipas tij, tentativa e dytë me anë të një komisioni i cili është formuar nga Qeveria e Kosovës për ligjin e pagave është sërish i gabuar.
“Qeveria dhe institucionet përkatëse janë alarmuar dhe kanë formuar një komision i cili është duke punuar me ligjin për paga, me të cilin veprim ata e kanë kuptuar që ligji paraprak ka qenë i gabuar, por defekti i parë është që edhe kjo tentativë e dytë për ta bërë një ligj tjetër është e gabuar për faktin që nuk na kanë thirrur ne, që të jemi pjesë e këtij ligji, pasi ne kemi qenë ata që kemi ngritur pakënaqësinë për ligjin paraprak. Ne nuk do të lëshojmë pe”, u shpreh ai.
Morina tha se duhet të bëhet e qartë se për shëndetësinë në nivel të Kosovës, nuk mund të vendosin njerëz jo profesionistë.
“Duhet të bëhet e qartë së për shëndetësinë në nivel të Kosovës, nuk mund të vendosin njerëz jo profesionistë. Për këtë sektor nuk mund të vendosin partitë politike. Nuk mund të anashkalohet një institucion i këtij niveli universitar”, theksoi ai.
Morina në këtë intervistë tregoi se në grevë aktualisht janë rreth 220 kirurgë, nga të gjitha repartet e Kirurgjisë, duke shtuar se para tri jave kanë pasur një takim me ministrin e Shëndetësisë, Uran Ismajli, si dhe me drejtorin Basri Sejdiu.
“Nuk kemi gjetur gjuhë të përbashkët”, ka thënë Morina. /Telegrafi/