Forca të shtuara të KFOR-it janë parë të dielën në veri të vendit, saktësisht afër pikës kufitare Jarinjë, ku për sot është paralajmëruar një protestë.
Nga KFOR-i, kanë njoftuar se përforcimi i trupave është bërë për shkak të prezencës së mundshme të grupeve kriminale mes protestuesve.
“Të gjithë personat që marrin pjesë në protestë të shmangin dhunën dhe të shprehin mendimet e tyre në mënyrë paqësore – për të shmangur çdo veprim joproporcional, qëndrim agresiv dhe sjellje që mund të keqkuptohen dhe të perceptohen si provokim apo dhunë e panevojshme”, thuhet në njoftim.
KFOR-i ka krijuar një kordon me blinda dhe tela të gjembuar.
Disa organizata të djathta nga Mali i Zi, Republika Srpska dhe Serbia e kanë paralajmëruar përmes rrjeteve sociale një protestë për orën 13:00.
Tashmë një numër i tyre janë mbledhur afër pikës kufitare Jarnijë.
Pamjet nga atje tregojnë persona që shihen të masakuar e duke bartur një pankartë me flamurin e Serbisë.
Situata e njëjtë është edhe në Bërnjak. Disa nga rrugët në veri të Kosovës, vazhdojnë të jenë të bllokuara për të nëntën ditë më radhë, si pasojë e vendosjes së barrikadave nga serbët lokalë si shenjë revolte ndaj arrestimit të ish-zyrtarit policor, Dejan Pantiq.
Policia e Kosovës ka njoftuar mbrëmë se gjatë natës ka vazhduar vendosja e një barrikade të re në lagjen Berxhane që shpie për në Zveçan, për të vazhduar pengimin e lirisë së lëvizjes së lirë edhe në rrugët alternative. /Telegrafi/
