Në prag të zgjedhjeve të parakohshme parlamentare të caktuara për më 11 dhjetor, “Ne vendosim” hapi linjë telefonike falas, ku qytetarët mund t’i denoncojnë shkeljet e të drejtës së tyre për të votuar, shkruan Telegrafi Maqedoni.
Shkeljet e të drejtës së votës qytetarët mund t’i denoncojnë në linjë falas SOS 0800 88 888, e cila do të jetë e hapur çdo ditë pune prej orës 9 deri në orën 21, ose në e-mail-in: sos@nieodlucuvame.mk .
”Qytetarët mund t’i dërgojnë denoncimet e tyre duke i shënuar të dhënat e tyre personale ose në mënyrë anonime. Fshehtësia dhe pacenueshmëria e të dhënave personale janë të garantuara dhe ato nuk do të publikohen pa marrë leje paraprake nga ana e qytetarëve, të cilët e kanë denoncuar shkeljen konkrete.
I inkurajojmë të gjithë qytetarët që kanë njohuri për shkeljen e të drejtës së votës në formë të agjitimit, frikësimit ose në ndonjë formë tjetër, këtë ta denoncojnë në linjën falas SOS” thonë nga “Ne vendosim”./Telegrafi/