Këshilli Prokurorial i Kosovës (KPK) ka rikonfirmuar listën e kandidatëve për Kryeprokuror të Shtetit, të cilët do të intervistohen pas një jave nga paneli vlerësues.
Ky rikonfirmim i kandidatëve ka dalë si nevojë pas tërheqjes së prokurorit Arben Ismajli nga gara për Kryeprokuror të Shtetit.
Po ashtu, Këshilli Prokurorial i Kosovës ka ftuar më 18 mars 2022 pesë kandidatët për Kryeprokuror të Shtetit për intervistimin e tyre nga Paneli Vlerësues, thuhet në njoftim, transmeton Telegrafi.
Kandidatët e rikonfirmuar sot nga Këshilli Prokurorial i Kosovës janë:
1. Armend Hamiti, Prokuror në Prokurorinë Themelore të Prishtinës;
2. Blerim Isufaj, Kryeprokuror në Prokurorinë Speciale të Republikës së Kosovës;
3. Kujtim Munishi, Kryeprokuror në Prokurorinë Themelore të Prishtinës;
4. Lulzim Sulejmani, Prokuror në Zyrën e Kryeprokurorit të Shtetit dhe
5. Shqipdon Fazliu, Prokuror në Zyrën e Kryeprokurorit të Shtetit.
Përzgjedhje Kryeprokurorit të ri bëhet pasi kryeprokurorit aktual Aleksandër Lumezi i skadon mandati në prill të këtij viti.
Mandati i kryeprokurorit të shtetit është 7 vjeçar, pa mundësi riemërimi.
Lumezi pozitën e tij si kryeprokuror e kishte marrë më 21 prill të vitit 2015, pas dekretimit të tij nga ish-presidentja e Republikës së Kosovës, Atifete Jahjaga./Telegrafi/