Ferronikeli me gjasë do t’i bashkohet Ligës së Kampionëve, por përballjet e kampionit kosovar me ekipet e mëdha ka fare pak gjasa të ndodhin për një periudhë.
Aktualisht në fuqi është vendimi që kampioni i Kosovës të luajë në fazën e parë kualifikuese të Ligës së Kampionëve, ndërsa fituesi i Kupës së Kosovës në futboll në fazën e parë kualifikuese të Ligës së Evropës në edicionin 2016/17, shkruan sot Koha Ditore.
Por kusht për paraqitjen e dy ekipeve kosovare në garat evropiane është plotësimi i kritereve minimale të UEFA-s. Përgjigjja për plotësimin e kritereve pritet të vijë javën tjetër. Shpresohet në përgjigje pozitive.
Ferronikeli pret të konfirmohet si pjesëmarrës në kualifikime për Champions, ndërsa në finale të Kupës, të shtunën (sot), përballen Prishtina e Drita. Fituesi i finales do të luajë në kualifikime për Ligën e Evropës nëse plotësohen kriteret.
Me Ferronikelin do të jenë 79 skuadra nga 54 vende anëtare të UEFA-s që do të luajnë në edicionin 2016/17 të Ligës së Kampionëve. Lihtenshtajni nuk ka ligë të veten dhe nuk ka përfaqësues në Champions.