Kepa Arrizabalaga mund të ribashkohet me Maurizio Sarri në Lazio, ndërsa Chelsea janë gati ta marrin portierin shqiptar Thomas Strakoshën si lojtar i lirë.
Lazio është në kërkim të një portieri të ri, pasi Strakoshës i ka skaduar kontrata, ndërsa Pepe Reina gjithashtu nuk duket se do të qëndrojë në ‘Olimpico’.
Zgjedhja e tyre e parë është Marco Carnesecchi në pronësi të Atalantës, i cili aktualisht është i huazuar te Cremonese, por ai mund të jetë jashtë për disa muaj pas operacionit.
Sipas RMC Sport, zgjidhja mund të bëhet nëse Lazio e merr Kepan në huazim nga Chelsea, ku ai nuk është i lumtur me konkurrencën e Edouard Mendy.
Nga ana tjetër, Chelsea do të nënshkruante me Strakoshën si zëvendësues të Mendyt, pavarësisht raporteve se portieri shqiptar kishte një marrëveshje me Fulham.
Sarri dhe Kepa sigurisht që kanë një histori nga koha e tyre së bashku në Chelsea, veçanërisht kur portieri spanjoll refuzoi të zëvendësohej në kohën shtesë gjatë finales së Kupës Carabao në vitin 2019.
Ai më vonë këmbënguli se kishte një keqkuptim, por Sarri ishte përpjekur të zëvendësonte Kepan dhe ai nuk pranoi të dilte jashtë.
Chelsea pagoi mbi 70 milionë euro për ta nënshkruar nga Athletic Bilbao në vitin 2018, megjithatë ai tani po ngroh stolin në Stamford Bridge me vetëm 15 ndeshje gjatë gjithë sezonit. /Telegrafi/