Menaxhmenti i Universitetit të Prishtinës ka hequr nga listat e pagave të muajit prill katër profesorë të fakulteteve të ndryshme, me arsyetimin e mungesave në punë.
Ndalja e pagës për muajin prill, si dhe dërgimi i tyre në komisionin disiplinor-Këshillin e Etikës të UP-së, është bërë pas raportimit për mungesat e tyre nga dekanët e njësive akademike.
Prorektori për mësim në UP, Naser Sahiti, ka thënë për “Kohën Ditore” se dekanët e dy njësive akademike kanë lajmëruar se disa nga profesorët e tyre kanë munguar gjatë në punë.
“Mungesa e stafit në punë është lajmëruar nga dekani i Bujqësisë, Skënder Kaçiu, dhe nga ai i FSHMN-së, Tahir Arbneshi”, ka thënë Sahiti.
Prorektori Sahiti ka thënë se paga zero euro për muajin prill u ka dalë profesorëve: Qëndrim Gashi nga FSHMN-ja, Ibrahim Mehmeti dhe Ardita Jahja-Hoxha nga Fakulteti i Bujqësisë, dhe Lutfi Dervishit nga Fakulteti i Mjekësisë.