Gjatë kryerjes së një prej detyrave të para publike që nga marrja e titullit të Princeshës së Uellsit, Kate Middleton preku zemrat e shumë njerëzve duke kujtuar njëkohësisht princeshën e ndjerë, Diana.
Të mërkurën, Princesha vizitoi njësinë e maternitetit të Spitalit ‘Royal Surrey County’ për të mësuar rreth punës së tyre me gratë shtatzëna dhe nënat e reja.
Me të mbërritur në spital, ku lindin rreth 3.000 foshnja çdo vit, Kate u takua me stafin nga reparti që ndihmon gratë me sëmundje mendore gjatë shtatzënisë dhe periudhës pas lindjes.
https://twitter.com/surreylive/status/1577698776726347783?ref_src=twsrc%5Etfw%7Ctwcamp%5Etweetembed%7Ctwterm%5E1577698776726347783%7Ctwgr%5E799b3a39d175a33c8f38a0e4e52b189e045ed193%7Ctwcon%5Es1_c10&ref_url=https%3A%2F%2Fwww.klix.ba%2Fmagazin%2Fshowbiz%2Fkate-middleton-emotivnim-susretom-u-bolnici-raznjezila-mnoge-i-podsjetila-na-princezu-dianu%2F221006017
Megjithatë, vëmendje të veçantë tërhoqi takimi i princeshës me një foshnje të lindur para kohe. Kate foli me nënën e foshnjës, Szilvia Novak dhe më pas e mori në krahë Biancan e vogël. Ky veprim kujtoi princeshën Diana, e cila shquhej për punën e saj humanitare, veçanërisht për marrëdhëniet me fëmijët.
Fotografitë e vizitës u shpërndanë gjithashtu në profilet zyrtare të Princit dhe Princeshës së Uellsit, ku Kate vlerësoi përpjekjet e spitalit për të siguruar që gratë dhe familjet e tyre “të ndihen të sigurta, të mbështetura dhe të kenë shanset më të mira për të zhvilluar ato lidhje të hershme që janë kaq të rëndësishme për të siguruar rritjen dhe përparimin e foshnjave të tyre”.
“Ishte bukur të takoja disa nga nënat e reja dhe foshnjat e tyre që mbështeten nga një ekip kaq i mrekullueshëm në spital”, është shprehur Middleton.
Vitet e fundit, pjesa më e madhe e punës publike të Princeshës Kate është fokusuar për të ndihmuar në zhvillimin e fëmijëve, ndërsa për këtë është frymëzuar nga përvojat e saj si nënë e tre fëmijëve. /Telegrafi/